Páxina nel facebook Premiu Meyor Cantar @P_Meyor_Cantar

La Banda de Gaitas El Trasno ganó la última edición del Premiu al Meyor Cantar.

“Volviche”, de la Banda de Gaitas El Trasno, foi’l cantar ganador de la octava edición del Premiu al Meyor Cantar.

La Banda de Gaitas El Trasno créase nel añu 1999 na Escuela de Música Tradicional del conceyu de Cuaña, y la mayoría de los sos componentes son escolinos y escolines d’esti centru, onde ponen clas los hermanos José Manuel y Javier Tejedor. El so repertoriu ta compuestu, na mayor parte, de pieces tradicionales asturianes, aunque cuenten con un bon piñu de melodíes de creación nueva. Nestos quince años d’andadura, la banda tien actuao per tol territoriu asturianu y en dellos festivales europeos.

Nel mes d’avientu del 2013 editaron el discu Axeitín, baxo la dirección musical de Javier Tejedor, y onde participaron dellos músicos de sonadía dientro de la escena folk d’Asturies, como José Manuel Tejedor, Rubén Bada, Rubén Álvarez o Israel Sánchez. Nesti discu predominen los temes instrumentales, anque incluye tamién dos pieces cantaes: «La Capitana», del músicu xixonés Carlos Rubiera; y «Volviche», con lletra en gallego-asturianu del escritor tapiegu Xosé Miguel Suárez Fernández y que ye’l tema ganador d’esta edición del Premiu.