Información de la convocatoria 2012

El miércoles día 4 de xineru del 2012, el Boletín Oficial del Principáu d'Asturies (BOPA) publicó la convocatoria del «Premiu al Meyor Cantar» en llingua asturiana o gallego-asturianu, un gallardón qu'alcanza anguaño la sesta edición.

Hasta'l día 21 de xineru ta abiertu'l plazu pa que los intérpretes o grupos interesaos soliciten participar, indicando la canción escoyida pa concurrir al premiu. Acordies coles bases, pueden optar a esti gallardón los cantares con lletra n'asturianu o gallego-asturianu que se comercializaren ente'l 1 de xineru y el 31 d'avientu del 2011, siempre que sían obres musicales de creación orixinal. Queden escluíes les pieces tradicionales yá existentes, les versiones o adaptaciones d'obres de creación publicaes orixinalmente n'otra llingua, y los cantares que nun s'editaren y grabaren pela primer vez nel añu 2011.

Un xuráu formáu por espertos en música y llingua asturiana va escoyer ente los grupos o solistes que se presenten a cinco finalistes, que van actuar en directo na Gala d'Entrega del Premiu, que se va celebrar nel Auditoriu de la Casa la Cultura «Teodoro Cuesta» de Mieres en febreru, amás de retresmitise pela Televisión del Principáu d'Asturies (TPA). El grupu o intérprete ganador nesta edición va representar internacionalmente a Asturies nel Festival de la Canción en Llingües Minoritaries Liet International, organizáu col apoyu del Conseyu d'Europa. El Gobiernu del Principáu d'Asturies instituyó esti Premiu nel añu 2007 col oxetivu de consolidar, arriquecer y prestixar la creación musical asturiana.