Premiu Meyor Cantar 2010 Presentación gala Premiu al Meyor Cantar.

Introducción

El “Premiu al Meyor Cantar” nació nel añu 2007 como reconocimientu del Gobiernu del Principáu d’Asturies a la creación musical en llingua asturiana o gallego-asturianu, y llega esti añu a la so cuarta edición. Acordies coles bases, puen optar a esti galardón les canciones con lletra n’asturianu o gallego-asturianu que fueran comercializaes ente’l 1 de xineru y el 31 d’avientu del 2009, una y buenes sían obres musicales de creación orixinal. Na presente edición, cumplíen estos requisitos un total de 106 temes interpretaos por 21 grupos o artistes.

Información de la gala

La Gala d’Entrega del Premiu al Meyor Cantar va celebrase’l sábadu 20 de febreru nel Auditoriu de la Casa de Cultura Teodoro Cuesta de Mieres. La hora pa empezar ye a les 19.00 hores pero pa favorecer el desenvolvimientu de la Gala nun se va permitir la entrada de públicu a partir de les 18.50 hores. La entrada ye llibre hasta completar un aforu de cerca trescientes butaques. Nel trescursu de la Gala, que va tar conducida polos escritores y presentadores Vanesa Gutiérrez y Naciu Varillas, los cinco grupos finalistes van interpretar los cinco cantares qu’opten al premiu.

Depués d’escuchaes y vistes les interpretaciones en directo, el xuráu va a retirase a deliberar. Nesi tiempu, el cantautor Alfredo González, como ganador de la edición del Premiu al Meyor Cantar del añu pasáu, va dar un conciertu acompañáu de la so banda. Depués de l’actuación d’Alfredo va dase a conocer el fallu del xuráu.Depués de recoyer el gallardón, los ganadores van volver a interpretar el cantar premiáu.

Gallardón

Escultura creada pola artista María Xesús Rodríguez, que lleva por títulu “La Payarina ” (aluminiu, oleu y barniz. 18x18x4cm) y que tien un valor estimáu nel circuitu artísticu de más de dos mil euros.

María Xesús Rodríguez (Uviéu, 1959) inicióse nes artes plástiques como pintora, d’onde dio’l pasu a la escultura. La evolución de Rodríguez ye constante a la vez que fiel a dellos principios fundamentales: l’empléu de materiales averaos a lo industrial (cartón, aluminiu), la cercanía de los elementos representaos (agua, plantes, piedres...) y la tendencia a romper les llindes ente disciplines distintes (cuadros que recuerden a escultures xunto a escultures que s’asemeyen a pintures y se cuelguen de la parede).

Festival Internacional Liet

Gracies a les xestiones del Gobiernu del Principáu d’Asturies cola Fundación Internacional Liet, dende l’añu 2009 l’intérprete o formación que consigue la victoria nel Premiu al Meyor Cantar conviértese en representante oficial d’Asturies nel Festival Internacional Liet, certame musical onde son protagonistes les llingües minoritaries europees y que nel añu 2010 va entamase n’Escocia.

La edición del 2009 fíxose en Frisia, nos Países Baxos, y foi Alfredo González como ganador del Premiu al Meyor Cantar 2009 el representante d’Asturies. El Liet cuenta col sofitu del Conseyu d’Europa.

Bases

Descarga equí les bases »