@P_Meyor_Cantar
Finalistes Premiu al Meyor Cantar 2011: BLIMA
Finalistes Premiu al Meyor Cantar 2011: CORQUIÉU
Finalistes Premiu al Meyor Cantar 2011: FALA NON CADUCA
Finalistes Premiu al Meyor Cantar 2011: SKAMA
Finalistes Premiu al Meyor Cantar 2011: VERDASCA
Llegues,
Traes la calma, traes la llibertá
Finxes qu'aportasti de verdá
Pero tas lloñe, tas sin tar.
Fixes la mirada, adulces, nun la dexes esnalar
Qu'equí espera un besu míu, llistu pa españar
Ven conmigo a onde me lleves, dame vida, ensin esperes
Fai qu'algame'l sitiu onde quies tar
Qu'equí espera llistu pa españar...
Míresme,
Faes qu'allume entera la ciudá
Qu'abocane esta escuridá
Pero yes otru, ¿ónde tas?
Cuéntote les mios velees, onde busco mil maneres
D'alcontrar dalgún remediu, pa que dexes de mancar
Quiero curiate, daveres, que te rías, que m'enseñes
A ver los tos güeyos, sin clisar
Algo pa que dexes de mancar...
(estribillu)
Señaldá,
De les hores que tu nun me das
De pallabes que faen olvidar
Les esquirles d'otros tiempos...
Y qué más da,
Si nun veo más que señaldá
Nel mio aire güel a soledá
Y séquense los besos.
Marches,
Torna la tormenta, yá nun tas,
Déxesme ensin fuelgu una vez más
Llárimes de sal... señaldá.
(estribillu)
Señaldá,
De les hores que tu nun me das
De pallabes que faen olvidar
Les esquirles d'otros tiempos...
Y qué más da,
Si me queden ganes de lluchar
Polos diez que yá nun vendrán
Trayendo mil rebelgos...
Blima ye un grupu encuadráu nel denomináu folk de cámara o, lo que ye lo mesmo, folk interpretáu por formaciones de formatu reducíu. Naz nel añu 2006 como tríu pa convertise nel 2010 nun quintetu. La propuesta musical de Blima quier amosar toles sos influencies y idees ensin nengún llímite, aportando dinamismu y frescura al productu final, a la so música, una música caltriada por un estilu personal y orixinal. BIima basa la so propuesta na reellaboración de temes tradicionales y sobre too en composiciones propies, yá sían instrumentales o cantaes, con averamientos importantes al jazz, el bluegrass, el pop y, incluso, a la música más minimalista. Tienen publicaos dos trabayos discográficos de folk acústicu: Entamu y el más nuevu, Express, onde se pue atopar el tema que presenten al concursu: “Señaldá”.
Cuando te vas
siento l'alma balera al colar
baleru queda'l mio coral
murnia me quedo si te vas.
El to tornar
ye l'aniciu que queda de ti
la llume encesa del llar
nordeste dende la mar.
Si tu nun tas
l'amargura nun tarda en llegar
la casa entama a noxar
el día quier anublinar.
Col to colar
la to xente murnia quedó
dalgún quier empapuxar
al saber qu'equí nun tas.
Siento picar na puerta
salgo corriendo creo que yes tu
pero al abrir
l'aire denso devuelve murnia.
La cama que dexeste
dexa escapar l'arrecendor a ti
el to golor
agospiáu nesta casa queda.
Cuando te vas
siento l'alma balera al colar.
El to colar
dexa murnia, desta, señaldá.
Si tu nun tas
anque nun seya munchayá
la casa entama a noxar
el día quier anublinar.
Col to colar
la xente encibielló,
dalgún quier empapuxar
al saber qu’equí nun tas.
Los que te conocieron
nun t’escaecen, alcuérdense de ti,
sólo por ti
dicen que ye meyor el mundu.
Cola to marcha queden
murnios y tristes,
llenos señaldá
dexa fondu duelgu na vida.
Cuando te vas
siento l’alma balera al colar.
El mio coral
esperando queda si te vas.
Sé que nun coleste
que sigues con nosotros
na nuesa casa
que nun nos dexeste
y siéntote cerca
a la mio vera siéntote baltar.
Cuando te vas
siento l’alma balera al colar.
El mio coral
esperando queda si te vas.
Si te vas.
Si te vas.
Corquiéu entama l’andar musical nel 1997 en Ribeseya, lo que los convierte nuna de les bandes más veteranes y representatives de la escena folk asturiana. Tienen espublizaos los discos La Barquera, Salia y el más recién, Suaña – al que pertenez “Alma balera”, el tema col que participen nesti Premiu al Meyor Cantar–, y que sigue la llinia de los trabayos anteriores, con predominiu del soníu acústicu y un repertoriu a base de setsinstrumentales y temes cantaos. Corquiéu interpreta canciones de composición propia onde axunta’l dulzor de la voz de la so cantante cola enerxía de los temes instrumentales. Formen un septetu que destaca pol procuru que pon nos aspectos vocales, rítmicos y melódicos. La banda lleva fecho xires pelos festivales más importantes d’Europa.
Pensatible plasmáu silenciosu
Como'l pitu a la vista'l raposu
Cuando menos barrunta quietu, atentu
Sintiendo esti reggae nel firmamentu
Crucia les pates, ponte a un llau
Mira'l pote si ta sosu o mui saláu
Españen los hastiales del verbu y el calce
El xacíu ye un ermu semáu de tonaes
Dende la xamaica lloñe
Siento afalagos que me bancien y m'endolquen
Cañicándome ayenu ensembre calecíu
Cimblando con pruyíu nes ribes del ríu
Sele sound system - sele sound system
Peles querencies n'abertal
Sele sound system - sele sound system
Pelos calces inertes
Sele sound system - sele sound system
Mestura de la música rastamán
Sele sound system - sele sound system
Empetra esti retayu con reggae xamaicán
Mestura de la música
Notes refierven nel vientu
Rabaseres de notes
Paecen amarrase al movimientu
Una abisal garganta
Ruxente de los piélagos
Finca'l secu porru
Fediondu ente los llabios
Sele sound system - sele sound system
Peles querencies n'abertal
Sele sound system - sele sound system
Pelos calces inertes
Sele sound system - sele sound system
Mestura de la música rastamán
Sele sound system - sele sound system
Empetra esti retayu con reggae xamaicán
Fala Non Caduca naz a primeros de 2007 de la inquietú que sintieron dellos componentes de bandes moces asturianes pola esploración de posibilidaes sonores nueves. Fala Non Caduca etiqueta’l so propiu soníu como “Mecigayu son”, al recoyer influencies ska, rock, funk, reggae, hiphop, metal... amestaes con un claru componente identitariu asturianu y con presencia de la gaita nes sos composiciones. Amás, fai gala de la so actitú comprometía y reivindicativa pa cola situación de la llingua asturiana, los conflictos llaborales o la defensa del mediu ambiente. Fala Non Caduca llama nos sos cantares a actuar pa camudar les situaciones adverses. Depués de participar en dellos recopilatorios y trabayos colectivos, en 2010 publicaron el discu Tiempu de Povisa. Concursen nesta edición del Premiu al Meyor Cantar col tema “Sele sound system”.
¿Cuántes veces m'allanasti la mente
dende aquella puta despidida?
Pa dicime una y otra vez,
anque nun acepte,
que fuisti dalguién na mio vida.
Y toles nueches m'apetez frayar
a cabezazos la puerta'l roperu
y matar la conciencia
que me manda llamate
pa dicite que t'odio,
pa dicite que te quiero.
Condenéme a vivir condenáu,
condenáu a perdete de vista,
que m'esboco
y tembla hasta'l Sueve
con ver el to pueblu dende l'autopista.
Aquel veranu que pasemos xuntos
llévolu grabáu en corazón,
curtiu pa namorate,
intensu pa olvidate
por muncho que digas que non.
Con sobredosis de sinceridá
volvisti nuna puta mierda d'amistá
l'adicción que sentía
cuando más confundía
la pantomima cola realidá.
Y nun m'arrepiento de tanto sufrir
por nun aceptar querete compartir.
Que quiero más les cadenes
que llibrar les penes
que la llibertá nun diba parar de cuspir.
Skama la Rede ye una banda de ska-punk asturiana compuesta por cuatro candasinos, dos maliayeses, un lluanquín y un llionés afincáu en Candás. Nacíos nel añu 2003, acumulen yá más d’un centenar de conciertos y tienen publicaos tres discos: La nuesa hestoria , Echaos a la mar y Ye too mentira . Practiquen un estilu musical que se mueve mayormente ente’l ska y el punk, pero con pingarates de rock y folk, y componen les lletres siempre n’asturianu. Skama la Rede ye un grupu fundamentalmente de directu qu’interpreta rítmos aceleraos y baillables. Anque la mayor parte de los sos cantares se basen na reivindicación y la crítica social y política, el tema que presenten al Premiu al meyor Cantar, “Condenáu”, ye’l primeru de desamor que componen.
Enredando nel tou corpo,
muyer triste d'oyos claros,
cuido qu’el sol nunca fose
estranxeiro nas túas maos
y que nun candela el meiz
arabiao tres os teus pasos.
Fito á noite aveseda,
cedo, mui tarde pral alma,
a nortada trai el vento
y úas pantasmas train úa carta:
el mourén que vén de llonxe
ta chegando ás arribadas.
«Nesta llingua na que falo,
dígoche qu'inda te quero,
condo teña que deixarte
nun voi ser eu quen a fello;
he ir ás apalpadellas
cimbrando nun canigueiro.
Un goxo vei recoyendo
dúas mil lletras enxugadas,
as palabras son tan tristes
que xa nun guardan el augua;
el brion brancal del berzo
atanígame as bidayas.
Con un chucho qu'é un carambio
apurrindo frío al fougo
quero que nun te llamentes,
que guardes el tou tesouro,
qu'atarrezas d'ir buscarme
entre ríos y entre soutos.»
Vou semar solombras mestas
d'amenteiras y mapolas
y morrer entre os reigaños
mentres a mía vida atolla
y perderme nos fondales
das gadeyas da memoria.
Verdasca surde en xineru de 2006 de la xuntanza d’un grupu de músicos mozos procedentes de la Escuela Municipal de Música de Llanera y la Banda de Gaites La Raitana. Basen el so repertoriu na reellaboración de música tradicional asturiana, aunque tamién igüen composiciones nueves. Una de les principales característiques del grupu ye la mocedá de los sos componentes. Nel 2010 espublicen el so primer discu, D’abéu, que contó cola producción musical de Lisardo Prieto y onde desendolquen una propuesta musical basada nun folk d’instrumentación acústica. Presenten al Premiu al Meyor cantar el tema “Entre ríos y entre soutos”, interpretáu na modalidá llingüística propia del estremu occidental d’Asturies, el gallego-asturiano.
Dir ediciones anteriores»
